في المستشفى.. وبالتحــديد في صالـة إنتظــار النسـاء...!

اسال الله ان يملى قلبي وقلوبكم حبه..والحب فـي لله,,وان يجعل ممشانا دايمآ إليه سبحانه



هذا يا طويلات العمر على طاعة ربي ورضاه


قبل كم يوم الوالده تعبت علينا ..فـ وديناها المستشفى قسم الطوارى ..


خذنا ورقتنا وننتظر دورنا ندخل على الدكتورة



جلسنا حالنا حال البقيه....


دخلنا المستشفى الساعة9 وما جاء دورنا إلا الساعة 1....


وخلال هالساعات مر قدامي مواقف إنسانية لإنسانه اعتبرها نموذج مشرف ..نموذج حسسني بـ صغري


دخلت وحده ماتشوفين منها شي.. اسود في اسود ماغير عيونها ترمش من فتحة النقاب الضيق


دخلت وهي تدفع عربية جالسه فيها حرمة مُسنة....واضح انها امها



يوم تدخل هالاخت كانت صالة الإنتظار شبه فاضيه وفيه كراسي شاغره ..فجلست


شوي بدأت صالة الإنتظار تزدحم بـ المرضى...


فيوم امتلت..دخلت وحده ( تقريبآ 18 سنة)مع اختها(اعطيها12 سنه) مريضه وتتلوى من الألم


ناظروا يمين ويسار .يبون كرسي تجلس اختها المريضه ...فمالقيوا



شوي وشوف الحرمة تقوم وتنادي على البنت تجلس مكانها


بيني وبين نفسي استحيت من حالي...انا بخير المفروض ما اجلس وفيه مرضى واقفين


جسمهم مهدود من التعب ..مو قادرين يوقفوا على رجليهم من المرض..واشوفهم وبكل قلب باارد ما افز وقوم؟؟


وعـــادي ولا كأنه.؟؟


وربي شي مو إنساني بالمره..وفيه حقاره وفيه قلة وعي


فستحيت من نفسي وقمت وخليت الكرسي للي احق مني فيه..


واللي يحزن اكثر ان فيه بنات مرافقات لمرضى جالسين على الكراسي وكل وحده منكسة راسها بـ جوالها..منشغلين بالدردشة


والمرضى واقفين وفيه منهم كبار بالسن ..هم احق بالجلوس منهم



والله يا بنات هالحرمه ماجلست خلال هالساعات كلها .. مع إنه يجي وقت ,المقاعد تفضى..لكن ماجلست


وهذا اول درس تعلمته منها وهي ماتدري<<الله يكتب لها الاجر العظيم




طبعآ هم مثلنا ينتظرون دورهم على الدكتوره


واشوفها تحن على امها ( يمه تبين شي؟ ..اجيب لك شي؟؟...شوي الام تقول بردانه ..بردانه وانا امك)


وتقوم تتتلفت يمين ويسار وماهي عارفه ايش تسوي ...من وين تجيب لامها شي يدفيها


شوي الا خوها جاي معه كيس فيه اثنين موية صحة..


ومعه شرشف ازرق وشرشف ابيض ,فلحفت كتوف امها والثاني تغطي به رجليها ..


وتمسح على راس امها وتقول( يمه زين كذا ..مرتاحه كذا؟)


والام تقول ايه الحمدلله ايه زين..وتعطيها من هالدعوات الطيبة <<ياحظها



في نفس الوقت كان فيه وحده حرمه عشرينيه وااضح انها تعبااانه ..تتمايل من الألم في بطنها


فقربت منها وقالت لها اختي تبين شي اساعدك في شي ؟؟


قالت لها ,لا ,الله يسعدك شكرآ


تخيلوا ياخواتي لما يجيك احد يسأل عنك في وقت تحسين محد حاسس فيك؟؟


وربي وقتها تحسين انك تشافيتي بمجرد السؤال عنك


الله يجعلنا ممن يرحم فيُرحم..امين : (


ولما حبت هالاخت انها تشرب موية...كانت بتفتح غطاها وتشرب ..


ويادوب تبي تفتح الغطى, فجأة ناظرت المريضات وقالت: احد يبي يشرب موية تراها جديده مابعد انفتحت ..مين تبي تشرب


كلهم او اغلبهم ردوا عليها بالشكر ,وانهم مايبون...


فصارت هالحرمة مثل ...!


مثل ايش ياربي..؟؟


مثل البلسم....ايه مثل البلسم...هذا اقرب شي ممكن اوصفها به


يعني كانت تحاول تساعد ..تحاول تقدم شي للمرضى


حتى لما يفتح باب الدكتوره...فتنادي الدكتوره ع المريضة ..وصوتها ما يسمع


فصارت الحرمة توقف على باب العيادة


وتنادي الاسم اللي تنادي عليه الدكتورة.. لان بعض اللي كانوا موجودات من شدة الألم مايعون ايش اللي حولهم


فممكن يفوتهم دورهم لانهم ماانتبهوا لـ الدكتوره وهي تناديهم.


فصارت الاخت تقوم بهالمساعدة لهم



المهم حصل إني انشغلت مع امي وحريم جنبها يسولفون...ونسيت من هذيك الاخت


فتذكرت صلاة العشاء ماصليتها ..فقمت بروح دورة المياه بتوضى


فتحت الباب الحمام (اجلكم الله) ..وتفاااجئ بأذاك المنظر


تدرون من شفت؟؟


7


شفت الحرمة نفسها...........لكن تدرون وش شفتها تسوي..؟؟؟؟؟


شفتها تطش ارضيه الحمام بالمويه....وبيدها الثانية ممسحه...


يعني كانت تنظف الحمام وتجففه من المويه ..


حتى كان فيه كذا منديل مرمي على مغسلة اليد..خذتهم ورمتهم بالزباله


قلت :فيه هنا عاملات..وهذا شغلهم....فقالت العاملات مشغولات


والمريضات يدخلون الحمام وهم معميات من الالم ضعيفات ممكن تتزحلق رجل الوحده ..


وسندت الممسحة على ركن الجدار وطلعت.

هنا سؤال يراودني بسأله لكم

المهم حصل ونادوا على دورنا ودخلت انا وامي ...


دخلنا غرفه واسعه فيها عشر اسرة...كل سرير يفصله عن الثاني ستارة


انسدحت امي على سرير تاخذ مغذي ..ودخلت الاخت مع امها ونفس الشي سدحتها ينتظرون المغذي


والاخت العشرينيه اللي قلت لكم عليها اخذت سرير جنب امي


وكان برودة المكيف لا تطاق..جدآ برد على المرضى


خاصة مع المغذي..احسهم جمدوا


فصاروا ينادون على الممرضات برد سكروا المكيف..بردانين...


امي جمدت إلا شوي,,,فكلمت اقرب ممرضه وقلت لها خففي برودة المكيف..وطناااش


ورجعت كررت عليها ..فخففت


لكن مازالت البروده قوية


والعشرينيه تقول بصوت يرجف بررررررد.....بردانه...سستتر برداانه<< ومحد حولها حزنتني


ومادريت الا الاخت جات عند العشرينيه وقالت سلامتك يا اختي وانا قلت لهم يسكروا التكييف


وهي تسولف معها اخذت لحافها وتثنيه وتلفه على رجلين العشرينيه وتلف اللحاف عليها ومن عند جنوبها


والعشرينيه تقول الله يسعدك ..الله يسعدك دنيا واخره شكرآ لك.الله يسعدك


ويوم قرب وقت خروجهم مرت على كذا مريضه تسلم عليهم


مرت عند البنت ام12 سنة..وتقولها سلامة بنتكم وعساها بخير الحين ؟


ومرت على حرمة كبيره تسلم وتتحمد لها بسلامه....مو قلت لكم صايره مثل البلسم؟


سبحان الله العظيم


ايش اللي يخليها تتحمل وقوف خمس ساعات عشان غيرها يجلس؟؟


ايش اللي خلاها تباشر بالموية على المرضى..وتبديهم على نفسها؟؟


ايش اللي خلاها تدخل الحمام وتنضفه وتجفف الارضيه من المويه ..رغم انها تقدر تنادي العاملات؟؟


ايش اللي خلاها تلحف هذي من البرد...وفيه ممرضات شغلهم العناية بالمريض؟؟؟


ايش اللي بعد هالجهد وهالساعات باقي فيها حيل تمر على كذا مريضه وتسلم عليهم وتتحمدالله لهم بسلامة؟؟


هالحرمه وش تبي؟؟؟


تبي شي مني؟؟


تبي شي من المرضى؟؟


تبي شي من الدكاتره؟؟؟


تبي شي من العالم كله؟؟


وش تبي ؟؟


احسبها والله حسيبها انها تبي الاجر من رب العالمين ..فسأل الله ان يعطيها من فضله العظيم. .امين


ركبنا السيارة راجعين البيت ..


وانا ماغير افكر في هالحرمة..ورحمتها


قال تعالى (( "فبما رحمة من الله لنت لهم "))


فسبحان من اعطاها هذه القدره على الرحمه والين وتكون قريبه من الناس


تأملت في حال هالحرمة..واسترجعت فزعتها وكلامها الطيب وحنيتها على ناس ماتعرفهم


اقول بمكن ربي نظر لها نظرة رضى لاسخط بعده..وحرمها الله على النار


مصداقآ لحديث عن أبي هريرة رضي الله عنه عن النبي صلى الله عليه و سلم قال": من كان هينا لينا قريبا حرمه الله على النار ":


فقول يمكن لما ربي نظر لها وهي تنظف الحمام كتب لها الجنة من غير حساب


او لما رحمت المريضه ولحفتها فكتب الله لها محبته ورضوانه


ولما وقفت عشان تجلس البنت الصغيرة كتب الله لها ممن يقف يوم القيامة ساعة من نهار..
وانتم تعرفون ان هناك ناس يوم القيامة يقفون خمسين الف سنة ينتظرون الحساب..لدرجة ان منهم من يطلب الله ان يخلصهم من هذا الموقف حتى لو يكبهم في النار ..يارب سلم سلم


ولا يمكن ساعة مرت عليهم تطمئن عليهم وتتحمدالله لهم بسلامه استغفر لها سبعون الف ملك وكان لها خريف في الجنة .؟!


ولا اجر الحب في الله ..وما ادراك ما أجر الحب في الله

فسبحان الله العظيم هذا ماجاء في بالي من الاجر.. لكن فضل الله واسع..و نظرة رضى من ربي رحيم لايعلم احد مقدارها..


ليش لا؟؟


ربي كريم ..ورحمته واسعه وفضله عظيم


اسال الله لي ولكم ان يرزقنا حسن الخلق والعمل الصالح, و يجعلنا هينين لينين قريبين للناس لوجه الكريم


وان يجعلنا ممن يحب لاخيه مثل مايحب لنفسه ..


وان يجعلنا متواضعين في قوة..


وان يرزقنا نظرة رحمة و رضى منه سبحانه يرزقنا بها الجنة وينجينا بها من عذابه


امين

موضوع راائع جداا اميرة
فعلا اخت مثاليه وقليل جداا ما نجد مثلها هذه الايام
فالكل مشغول بحاله ولا وقت لديه لغيره مع انها لمسات بسيطه وثوابها كبير
اعاننا الله جميعاا على كل خير

اسمحيلي بنقله للقسم الانسب

بارك الله فيكي