ღ♥ وصفة مبتكرة ღ♥خدود الست بالقشطة

مسا الخير عالجميع

اليوم عملت خدود الست وطلعو بشهو

نيجي للمقادير

عجينة بقلاوة او جلاش
انا جبت عجينة مقسمة دوائر خصوصي لخدود الست
كل دائرة تقريبا 6 راقات

سمنة
قشطة
وفستق وكرز للتزيين طبعا اختياري

مقادير القشطة
كاستين حليب سائل
معلقتين سكر
3 ملاعق سميد ملاعق نشا
3 ملاعق حليب بودرة
حبتين كيري او لافشكري
نص علبة قشطة

قطر ومقاديره
3 كاسات سكر
كاستين الا ربع ماء
نقطتين حامض
عود قرفة

اول اشي بنعمل القطر قبل بوقت عشان يبرد منيح
بنعمل القشطة بنحط كل المقادير ما عدا القشطة والكيري عالنار
وبس يقربو يجمدو بنحط الكيري وبنحرك منيح بالخفاقة اليدوية
ويعدين بنطفي النار وبنحط القشطة وبنحرك منيح
طعم هاي القشطة كتير طيب

بنيجي لطريقة خدود الست

بندهن صينية بالسمنة منيح وبنحط اول طبقة من العجينة

بندهنهم منيح بالسمنة وبنحط فوق كل وحدة معلقة قشطة

بعدين بنحط طبقة تانية من العجينة وبندهنها بالسمنة
وبندخلها الفرن على نار هادية لمدة نص ساعة او اقل
المهم نحس انه العجينة استوت منيح
بنحمر الوجه تبعهم

بنطلعهم من الفرن وبنحط القطر عليهم
وانا عملته جامد شوي منشان يضلو يقرشو

بعدين بنزينهم بالقشطة والكرز والفستق الحلبي