العنايه بالشعر للمحجبات

اعتنى بشعرك تحت الحجاب

مع الأِسف فيه بنات بيهربوا من الاهتمام بشعرهم وعشان يتخلصوا من العبء ده يلبسوا الحجاب أو ممكن في زحمة الشغل أو المذاكرة ينسوا إن عندهم شعر أصلا..!!! ولما ييجي الوقت اللي البنت نفسها حد يشوفها في أجمل صورة وعلى رأسها أجمل تاج خلقه ربنا... تلاقي شعر هايش, باهت, مرهق ومقصف وحجتها: أعمل إيه؟ الحجاب السبب..!!
و طبعا الحجاب برئ من الاتهام دة

الشعر نعمة من الله -سبحانه وتعالى- وخلقه لنا زي "الزرع" بيزعل وبيفرح... لما كنتِ بتغسلي شعرك كويس زي زمان قبل الحجاب كنتِ بتلاقي شعرك فيه حياة وشكله حلو زي الوردة لما بتتفتح الصبح.. النهارده إنتِ بتلفيه تحت الطرحة ومكسلة تسلكي شعرك أو غسلتيه ولميتيه من غير ما تجففيه، بسرعة كده أي حاجة علشان مستعجلة، ومش بس كده ده إنتِ كمان ممكن تكوني مش غاسلة شعرك كويس ومليان قشر....

أغسل شعري كويس ازاي؟

الغسيل ده فن.... لازم نغسل الشعر من الجدر وندلك الشعر لحد ما تنضف فروة الرأس عشان نعطي المجال لظهور شعر جديد مكان الشعر المتساقط.... لأن الإهمال في غسيل الشعر بيكون قشر ويمنع الشعرة من الإنبات.... ومع الاستعجال وتغطية الشعر بسرعة بيتكون قشر كثير جداً وده بحجة إنك مش فاضية لشعرك.

أهمية تهوية الشعر!!

الشعر"المكمكم" سيئ للغاية والمشكلة إن البنت لا تعطي لشعرها فرصة عشان يتنفس ويتعرض للهوا والشمس.... لو الزرع بعيد عن الهوا أكيد هيموت.. نفس الشيء مع الشعر، لو مش فاضية ممكن تنشفيه بالسشوار ولكن تبعدي عنه الهواء الساخن بمسافة مناسبة عشان مانقصفش الشعر. وإنتِ بتستخدمي السشوار خلي أصابعك بين شعرك عشان تسلكيه وحركة الأصابع لتحت عشان تهدي الشعر، لا تتركي الشعر وهو هايش وتقربي منه السشوار لأن ده غلط ولو خايفة من سوء استخدامه لفي شعرك "طاقية بالبنس" أو بكلات أو لو مش عارفة سيبيه للهواء الطبيعي.....

مع طول فترة العمل أو البقاء خارج المنزل مرتدية الحجاب وطبعاً قلة تهوية الشعر وتجفيفه الخاطئ تأتي المشاكل.. والشكوى شعري مقصف ومش بيطول وهايش ومليان قشر.. ده نتيجة طبيعية للإهمال، والحجاب مالوش علاقة بالإهمال.

شطف الشعر بطريقة صحيحة!

بعد تدليك الجذور وفرك الشعر بين راحة اليد يشطف بالمية.. لو شعرتِ إن الشعرة لسه مابتلمعش اشطفيها مرة واثنين... لازم تتأكدي إن الشعر تخلص من الشامبو لآن بقاءه على الشعر سبب في ظهور طبقات القشرة المزعجة والمهلكة للشعر... أرجوكم بلاش "استعجال"... حطي بعد كده حمام كريم أو بلسم ولكن بعيداً عن جذور الشعر.. غلط جداً وضع مواد كيماوية قريبة من فروة الرأس أو عليها مباشرة لكن لو هتستخدمي الزيت لازم يصل إلى مسام وجذور الشعر، أما الكريم فمشكلته إنه ممكن يقفل المسام, في الحالتين سواء الكريم أو الزيت لازم شطف الشعر كويس جداً.

دلوقتي وقت تجفيف الشعر!!

تجفيف الشعر يكون "بحنية".. امسكي الفوطة بين إيديكِ وتنشفي شعرك بالضغط الخفيف لأن التجفيف العنيف وبحركات عكسية باستخدام الفوطة بيقطع الشعر، ولاحظي إن الفوطة بيكون فيها شعر كتير بعد التنشيف العنيف.. على فكرة ده هيسهل جداً تسليك الشعر.. بعد كده تبدئي تسلكي شعرك وحسب ما إنتِ عودتِ شعرك سواء المشط أو الفرشاة ونبدأ من تحت لفوق واحدة واحدة؛ لأن لو العكس هتوقعي شعرك، وتسليك الشعر بنفس الطريقة مع كل أنواع الشعر طويل أو قصير خفيف أو كثيف.. ادي لنفسك نص ساعة بعد غسله علشان يتهوى وينشف على راحته وبعد كده ممكن تربطيه وتلبسي حجابك عادي جداً.

المشكلة إن الشعر لو تركناه بدون ربط ليجف بالهواء الطبيعي بيهيش جداً وخاصة لو الشعر مش ناعم!!

ده أكيد ولكن لازم تتعلمي تهوي شعرك وتسلكيه واحدة واحدة وتعامليه "بحنية" وبأكد الكلمة دي لو الشعر ملمسه خشن وجاف وأنتِ بتتعاملي معاه بعنف أكيد هتتسببي في إيذائه أكتر.

كيف أختار نوع شامبو مناسب لشعري؟

شامبو الشعر الجاف المليء بالزيوت أو الكريمات لترطيب الشعر وبعد الشامبو ممكن أستخدم البلسم... أما لو الشعر دهني ابعدي عن الشامبوهات اللي ضمن مكوناتها بلسم أو فيها نسبة كريم عالية ولو شعرك عادي استخدمي النوعين أسبوع شامبو للشعر الجاف وأسبوع للشعر الدهني؛ علشان الشعر مايتعودش على حاجة واحدة فترة طويلة.

امتى أغير نوع الشامبو؟

كل ما تخلص العبوة جربي نوع جديد مناسب لشعرك لأن الشعر لو اتعود على حاجة واحدة بعد فترة، لو حبيتِ تغيري، شعرك هيكون باهت لحد ما يتعود على النوع الجديد.

هل من المفيد استخدام الصابون الطبيعي بزيت الزيتون؟!!

الصابون كويس لكن مش هينفع مع استعجال البنات.. عشان البنت تستخدم الصابونة لازم "ترغيها" كويس جداً وتمسكها كويس وهي بتغسل الشعر.. أعتقد إنها غير عملية وخصوصاً إنها محتاجة وقت ومجهود في الاستخدام.

هل هناك بديل لشامبو القشرة لأن أغلب الأنواع بتسبب جفاف الشعر؟!!

عندي نصيحة مفيدة جداً بس تداوموا عليها... بكوب من الخل وعليه فنجان شامبو مركز تدلكي فروة الرأس لمدة أربعة أسابيع -يعني شهر- هتحسي بالفرق وهتشوفي قد إيه القشرة قلت جداً من شعرك.

خطورة تكرار صبغ الشعر على فترات متقاربة، ولو حبيت أغير لون شعري يكون كل قد إيه؟!!

تغيير لون الشعر بلون تاني بيكون بعد مش أقل من 3 شهور للحفاظ على الشعر، مشكلة الصبغة هي احتواؤها على ماء الأكسجين وهي بالطبع ضارة جداً، وبالنسبة لي لا أميل لاستخدام الصبغات كثيراً وأفضل "الحنة" لأنها سنة عن الرسول الكريم -صلى الله عليه وسلم- ومناسبة لتلوين الشعر المجهد.

ازاي أختار لون صبغة يناسب بشرتي وشعري؟!

تغير لون الشعر لا يكون مرة واحدة.. ده غلط، لو عاوزة تفتحي شعرك لازم أفتح درجة درجة عشان أحافظ على شعري.. مش معقول شعري أسود غامق وأخلية أشقر فاتح مرة واحدة، ده هيتطلب مني إضافة أكسجين كتير للصبغة..
وحتى على المستوى النفسي لو غيرتِ شكلك مرة واحدة ممكن تتضايقي. التفتيح التدريجي بيعطي لك فرصة للوصول لأقرب لون مناسب ومريح لك قبل أي حد.

أحلى لون ممكن يناسب البشرة الخمرية أو المائلة إلى الاسمرار زي أغلب لون البنات المصريات؟

درجات الأحمر والبنيات والكستنائي ومن الفاتح الأشقر الداكن. أما البنت ذات البشرة الفاتحة بيليق عليها كل الألوان بكل درجاتها.

هل الميش أو الهاي لايت يؤذي الشعر أكتر من الصبغة؟

لا بالعكس إنتِ بتلوني خصلات من شعرك، والصبغة بنحطها للشعر كله.. النهاردة الميش الأحمر موضة جدا وكمان رجعت الخصلات الشقرا العريضة.

عاوزين نعرف نقص شعرنا كل قد إيه؟!

لو عاوزة تطولي شعرك لازم تقصي أطرافه كل 3 شهور على الأقل. لكن لو نفسك تغيري شكلك وتعملي استايل لشعرك ممكن القص يكون كل شهرين... تغيير شكل الشعر كل فترة يترك أثر نفسي كويس.. ليه نهمل نفسنا؟.. ليه؟..!!! فيها إيه لما أكون حلوة لنفسي وزوجي وأولادي.. الحجاب مش بهدلة وفرصة أخبي شعري، بالعكس دي فرصة تعملي في شعرك كل الحاجات اللي ممكن تتكسفي تجربيها لو إنتِ مش محجبة، لو نفسك تعملي شعرك أحمر أو أصفر أو ميش عريض أو خفيف أو حتى تقيل.. اعملي الشكل واللون اللي على ذوقك.. وأي حاجة تخليكي جميلة، "الله جميل يحب الجمال".

إيه علاج الشعر المرهق بسبب كثرة الصبغة أو المرض أو بسبب الانشغال الدائم عن الاهتمام به؟!

الحنة هي سر علاج الشعر المرهق وهي سنة عن النبي الكريم -صلى الله عليه وسلم- بس عاوزة استمرارية ومداومة وتحطيها بنية علاج الشعر، لو هتستخدمي الحنة لازم صبر والنتيجة هتشعري بيها، وطريقة استخدامها: تعجني الحنة بالمية الدافية والخل لو نفسك تلوني شعرك، ولو لترطيب الشعر اعجنيها بالزبادي وحطي كمان ملعقة عسل وتخليها على الشعر مش أقل من 3 ساعات كل أسبوع لمدة شهر وبعدين مرة كل شهر، وبعد فترة شعرك هيتحسن كتير قوي.. كمان مهم جدا الابتعاد عن الصبغة فترة استخدام الحنة لإعطاء الشعر فرصة حقيقة للعلاج من التساقط والإرهاق والتقصف والمظهر الباهت.

إيه الفرق بين الحنة السوداء والعادية؟

الحنة السوداء ليست للعلاج ولكنها تساعد في تغطية الشعر الأبيض وتستخدم بعد الحنة الحمراء لتغميق اللون وعلى جذور الشعر وتعجن الحنة السوداء بالمية السخنة والزبادي.

نصيحة للبنت المحجبة!

حِبي شعرك.. ربنا لم يأمرنا أبدا بحاجة تؤذي شعرنا، احنا اللي بنهمل في نفسنا ومكسلين وعاملين الحجاب شماعة... الحجاب حماية لشعرك من تقلبات الجو ؛ سواء حر, أو برد.. شعرك متغطي..

أكيد كل بنت بعد الموضوع ده هتخلي بالها من شعرها... والبنات يبطلوا شماعة الحجاب وإنه السبب في شعرهم الهايش المنكوش.. الحكاية بسيطة.. مجرد اهتمام بشعرنا مع كل غسلة.. بلاش نقطع شعرنا واحنا بنسلكه. بلاش نعامله بعنف لأنه فعلا تاج